PROXECTOS DE EXPRESIÓN ORAL

Para estas vacacións de inverno propóñovos 3 proxectos para facer cos peques en casa, nos que terán que traballar sobre todo, a expresión oral. Son propostas que sempre funcionan moi ben e que lles gustan moito. Coma sempre non son propostas obrigatorias pero penso que moi interesantes para eles/as.

SON EXPERTO/A EN .... Teñen que preparar unha mini exposición oral (10 minutos máximo) no que nos expliquen un tema no que sexan expertos. P.ex: son experta en patinaxe, en montar Lego, Harry Potter, trucos de maxia, cromos de Gorjuss, bailar, en facer acrobacias.... Teñen que decidir que nos van contar, escribilo e practicalo coma se tivesen público. Poden acompañar o que nos van dicir con fotos, vídeos ou o que eles consideren. Poden levar un papeliño con anotacións ou facede con eles un Power Point, o que queirades. O que sexa que vaian a amosar en formato dixital que o traian nun pendrive o dia que lles toque.  Ao rematar haberá unha rolda de preguntas para o experto/a . Pode ser en galego ou castelán.

ENTREVISTO A.... É un proxecto de vídeo no que a/o peque ten que entrevistar a algunha persoa sobre a súa profesión, un deporte que practique ou un hobbi ou talento interesante. Tendes que previamente preparar as preguntas con eles segundo sexa a razón pola que quere entrevistalo/a. Necesitan dunha terceira persoa que esté facendo o vídeo. Queda moi  simpático se levan un micrófono de xoguete. Traen o vídeo, o día que lles toque, nun pendrive. En galego ou castelán.

UN ANIMAL QUE ME GUSTA É ... Teñen que preparar unha charla sobre un animal que lles guste ou lles pareza interesante: porqué lle gusta, que ten de especial, onde adoita vivir, que lle gusta comer, que habilidades especiais ten, que os fai importantes para a natureza, como se reproducen, cantas crías adoitan ter....dependendo de que animal sexa podemos enfatizar unhas cousas ou outras. Teñen que escribir que van contarnos e poden apoiarse en fotos, un Power point, un papel co texto escrito, o que consideredes vai mellorar a charla e a atención do público, neste caso, os outros nenos/as de clase. O que sexa que vaian a amosar en formato dixital que o traian nun pendrive o dia que lles toque.  Máximo 10 minutos. Ten que practicalo a contar en casa antes de traelo á clase. Ao rematar tamén haberá rolda de preguntas. Ten que ser en galego.